» Notisias

Tersa, 18 Februari 2014

Reuniaun Ba-datolu Ministru/Responsavel Sira ba Igualdade Jéneru no Hakbiit Feto iha CPLP

Iha loron 13 no 14 Fevereiru 2014 iha Maputo, Moçambique, realiza tiha reuniaun ba-datolu Ministrus/Responsavel Igualdade Jéneru no Hakbiit Feto iha CPLP ho nia tema “Dezafius iha Prevensaun no Eliminasaun Violénsia bazeia ba Jéneru.” Partisipa iha reuniaun ne’e Estadu Membru sira hotu hanesan Angola, Brasil, Cabo Verde, Moçambique (Prezidensia CPLP), Portugal, Sáo Tomé e Príncipe, no Timor-Leste. Hanoin tanba, Guiné-Bissau maka la marka prezensa iha reuniaun ne’e.

Husi Timor-Leste, Sua Exelénsia Sekretaria Estadu ba Asuntu Parlamentar, Sra. Maria Teresinha Viegas nu’udar reprezentante Sua Exelénsia Sekretária Estadu ba Promosaun Igualdade, Xefe Departamentu Ligasaun SEPI Sr. Henrique da Silva, no Inspetora & Auditora SEPI Maria José Sanches maka ba partisipa iha reuniaun ne’e. Reuniaun loron rua ne’e fahe ba faze rua, loron 13 Fevereiru ba Tékniku sira no loron 14 Fevereiru ba Ministru/Responsavel Pasta Igualdade Jéneru.

Pontu prinsipál tolu sai hanesan ajenda Reuniaun Tékniku sira nian iha loron 13 Fevereiru maka hanesan: (1) Informa kona-ba Lansamentu Kampaña CPLP nian Luta Hasoru Violénsia Hasoru Feto, (2) Revizaun no diskusaun ba Planu Asaun kona-ba Igualdade Jéneru CPLP, no (3) Diskusaun kona-ba textu Deklarasaun Maputo.

Kona-ba kampaña CPLP luta hasoru violénsia hasoru feto, kuaze país hotu-hotu maka lansa iha loron 25 Novembru 2013 ne’ebé koinside mós ho Lansamentu Kampaña Loron 16 Ativismu Hasoru Violénsia Bazeia ba Jéneru. Kampaña CPLP ne’e fó sai iha web-site (www.naoviolenciacontramulheres.cplp.org) ne’ebé furak tebes. Se karik ita ida-idak ne’ebé hakarak duni fo oin ba luta hasoru violénsia hasoru feto fó mos ita nia oin hamutuk ho movimentu ne’e.

Planu Asaun Igualdade Jéneru CPLP Moçambique, Estadu Membru uma na’in ne’ebé konvoka reuniaun ordinaria ne’e foti eixu/programa sia husi eixu/programa sanulu resin nen Planu Estratéjiku Igualdade Jéneru no Hakbiit Feto CPLP hodi prepara Proposta Planu Asaun Igualdade Jéneru CPLP ba tinan 2014-2016. Diskusaun hala’o kapaz iha ambiente komunidade CPLP nian ne’ebé maiské iha momentu balun diskusaun manas tebes maibe to’o ikus sempre hetan konsensu ida ne’ebé hako’ak Estadu Membru hot-hotu nia interese no hakarak.

Pontu ikus ne’ebé tékniku sira diskute maka Ante-projetu Deklarasaun Maputo. Hanesan mós ho Planu Asaun, Ante-projetu ne’e mos hetan diskusaun kle’an husi tékniku sira hafoin bele duni hetan konsensu ida maka bele akomoda hanoin hot-hotu husi Estadu Membru sira hotu.

Iha momentu ne’e mós partisipante sira hetan oportunidade hodi hare ezibisaun video kona-ba Kampaña CPLP Hasoru Violénsia Hasoru Feto. Ezibisaun ne’e hanesan insentivu ida ba Estadu Membru sira atu bele kontinua disemina kampaña ne’e. Nune’e mós buka ideia oin-oin ho kriatividade atu luta hasoru violénsia hasoru feto. Timor-Leste seidauk halo buat ruma signifikativu, tanba presiza buka dalan di’ak liu atu oinsá kampaña ne’e bele lori to’o komunidade sira iha área rurál.

Iha fali loron 14 Fevereiru 2014, Reuniaun Ministru/Responsavel Igualdade Jéneru no Hakbiit Feto ho nia objetivu atu apresia no aprova saída maka tékniku sira diskute tiha ona, nune’e mós asina Deklarasaun Maputo molok reuniaun da-tolu emata.

Sira nia ajenda ne’e hahú ho intervensaun husi Estadu Membru sira ida-idak kona-ba tema prinsipál “Dezafius iha Prevensaun no Eliminasaun Violénsia bazeia ba Jéneru”. Tuir kontestu nasaun ida-idak nian, intervensaun hotu hatudu katak estadu CPLP sira iha hotu kompromisu no determinasaun bo’ot atu luta hasoru violénsia bazeia ba jéneru no violénsia hasoru feto.

Kona-ba Kampaña CPLP Luta Hasoru Violénsia Hasoru Feto, Ministru/Responsavel sira hotu unanimu hodi konkorda atu kontinua halo diseminasaun kampaña ne’e, hodi haforsa asaun sira atu vizualiza no hametin esforsu sira ne’ebé ida-idak hala’o iha sira nia país. Sira mós apresia Proposta Planu Asaun Igualdade Jéneru CPLP ba 2014-2016 ne’ebé tékniku sira hetan tiha ona konsensu ida hodi halo planu ne’e ki’ik no simples liu ne’ebé bele garante katak Estadu Membru sira hotu bele implementa duni.

Ikus liu, molok reuniaun remata, husi Sekretariadu Ezekutivu CPLP lee tiha Deklarasaun Maputo hodi simu ajustamentu balun husi Ministru/Responsavel Igualdade Jéneru Estadu Membru sira no hafoin ne’e realiza ofisialmente Serimonia Asinatura Deklarasaun Maputo. Reuniaun loron rua iha Maputo ne’e la’o ho susesu no ho sentimentu simu malu ka solidaridade nu’udar komunidade ida ne’ebé hamutuk hodi luta ba promosaun igualdade jéneru no hakbiit feto CPLP.

Ho Maromak nia tulun, tinan 2016, Timor-Leste maka sei sai uma nain ba Reuniaun Ordinaria da-hat CPLP Ministru/Responsavel Igualdade Jéneru no Hakbiit Feto. Lee nain sira, keta haluha loke web-site ne’ebé refere iha leten no fó mós imi nia oin hodi hamutuk ho Movimentu ne’e atu luta hasoru violénsia hasoru feto.